Mar 11 | WSK | STEP | Nuna nama Jerusalem aratomonko pingi aman, ale wonong ilagala Bethphage se Bethany mu te nama arataman, mu Duruk Olive duap te. Se Jesus ko olekem ilagala nunga maonam,

Mark 11

Jesus king iwita Jerusalem ningi kasu naguram

(Mat 21:1-11; Luke 19:28-40; John 12:12-19)

1 Nuna nama Jerusalem aratomonko pingi aman, ale wonong ilagala Bethphage se Bethany mu te nama arataman, mu Duruk Olive duap te. Se Jesus ko olekem ilagala nunga maonam, 2 “Nina ilagala giral wonong nemeke ko aniso mu te namaralko. Ale tom nama nagural mu nina donkey kulak gotek bo kalo beteman se bagoso mu arigalko, kari bo ulengkala me te aragam ale dugu karo arigam. Umutang kutuwural ale ilak tairalko. 3 Se kari bo nenenga isok, ‘Nina anape ko donkey kutuwusan a?’ mauk, mu nina maonal, ‘Kari Biya ura te bitirukko se,’ malko. ‘Ura menaruk mu tairate bitiruk se peleruk tairukko,’ malko.”

4 Se ilagala namaman donkey kulak bo kawam bo duap te lage kuringi kalo beteman se aringiman, ale kutuwungaman, 5 se kari saki baga nunga isarman, “Nina anape ko donkey kutuwusan a?” maman. 6 Se nuna Jesus nunga maonam butata balman. Se kari ari mu balman, “Mu terong,” maman. 7 Se nuna ilagala donkey taman ale Jesus kote ago taiman. Ale nunga guang saki kututuwu donkey awete awuman se Jesus araga te daigam. 8 Se kariimet suen biya nunga guang saki kututuwu lage te murukasan. Se saki pator gawa batutumu lage te murukasan. 9 Se kariimet sang gira mu se, saki udagi mu buta aikasan ale balukasan:

“Hosiana! Anananga king taisowo!
Kari Biya marak sokel tuam se ko nup te taiso!
Nu nanga girigir David turan nanga bituokko!
Hosiana! Ana Kaem ko nup kualala biya patowanakko!”
11 Se Jesus Jerusalem ningi namaram ale temple ningi kasu naguram mel suen biya arigam gurugam. Bare sor baingam, se ko olekem 12 mu arungu arataman nama Bethany wonong te animan.

Jesus balam se tam fig marakam

(Mat 21:18-19)

12 Ukiram se nuna Bethany wonong beteman aking peleman Jerusalem taiwa Jesus na ko kueram. 13 Ale nu tam fig bo ko gawa suen biya mu arigam, awar nuam, se nu nunguning ko loagurukko namaram arigam, bare nunguning mena, gawa la. Mu awuk, tam fig nunguning kapurukko tom te mena. ^{▼▼Mark 11:13 (Micah 7:1-6; Jer 8:13).} 14 Se ko nu tam mu maonam, “Ni marakeko!” mam. “Udagi nunguning bitar se kari bo me naukko!” mam. Se ko olekem alo nu den balam mu ikiman.

Jesus kari temple ningi dia guruguwaman se nunga kaoram

(Mat 21: 12-17; Luke 19: 45-48; John 2: 13-22)

15 Nuna nama Jerusalem arataman, se Jesus namaram temple ningi kasu naguram, ale kari sipsip mel dia gurugu se animan mu nunga karokaso. Ale namaram Juda kari saki, sor saki ko manga Juda nunga manga te koma gurugu se animan mu nunga barim gurugu saparam se kapaman. Se kari saki inanganang biton mu dia manga towaman mu nunga daiga kuwim ago gurugu saparam se kapaman. 16 Ale balam, nunga mel tutuk gimon ale karogo lage temple ningi la namara ale komasang te arata mu me karomonko balam. 17 Ale nunga maonam, “Kaem ko batoga iwita balam se aniso: ‘Aninga kawam mu nuna balmon ali sor suen biya ko kariimet nunga ngatangara kawam,’ mamonko. ^{▼▼Mark 11:17 Isaiah 56:7.} Bare nina guruguman ale tere kari nunga kawam iwita ko beteman.”

18 Se priest bibiya, se Law Den ko kausa kari nuna den mu ikiman, ale lage bo aringimon ale Jesus te momon se kuerukko wore ko loagakasan. Mu nuna noko nguangakasan, mu awuk, kariimet Jesus ko kausa yawara mu ko ninguru kuakasan.

19 Worem kaparam sor baingam se Jesus ko olekem arungu Jerusalem beteman ale namaman.

Tam fig maraka kutuwuram

(Mat 21: 20-22)

20 Ukiram tumongola nuna aking lage karoman nama se Jesus tam fig ko den balam mu gawa, kower, luan, yager suen la maraka kutuwuram mu aringiman. 21 Se Peter Jesus ekalako den balam mu kuamin te tairam se balam, “Kari Biya, arikko!” mam, “Tam fig ekalako ni den ikup tuem mu maraka saparam,” mam.

22 Se Jesus nunga maonam, “Nina Kaem ko nengemang ningi nunguning arukko! 23 Ani nunguningta ninga manorsam, awiriya gomang me namuruk tairuk, ikia suwanta te duruk imi manuk, ‘Ni tinga gagi ningi kaparko,’ ma baluk, ale mel nu ko balam mu uwutata aratukko mu ko gomang ningi nunguning aora biya baguruk, mu mel mu am uwutata aratukkowo. 24 Umutang ko ani iwita ninga manorsam, nina mel bo ko Kaem aru maonal, ale mel ko balman butata aratukko nengemang ningi nunguning aora biya bagaral, mu mel mu uwutata aratukkowo.

25 “Tom nina sanamaral Kaem ilak munakaralko, mu nina giral bo ko nengemang ikuwawuruk agi mu, ko memek siwu saparalko. Nina butata beteral, mu ninga Nenet duruk te bagoso mu ninga memek ago siwurokko. ^{▼▼Mark 11:25-26 Batoga sang girakala batagorman mu te den imi agotala aniso: “Bare nina bo ko memek nengemang te aniso mu me kutuwu saparal, mu ninga Nenet duruk te bagoso mu betela ninga memek me siwurokko.”}”

Kari bibiya Jesus isarman, “Awiri ura ni kisam a?” maman

(Mat 21:23-27; Luke 20:1-8)

27 Nuna aking Jerusalem nama arataman, ale Jesus temple kar ningi kaparam geragawaram se priest bibiya, Law Den ko kausa kari, se kari bibiya kote taiman ale isarman, 28 “Awiri balam se ni ura mel suen biya imi betesam a?”

29 Se Jesus nunga maonam, “Ani betela isa bo ningarsam / ningarikko. Se koma balu aisal, mu ani awiriya balam se ura mel imi betesam mu ninga manikko. 30 John kariimet nunga anukaso mu Kaem balam se agi, kari balman se ura mu bitakaso wore balal se ikiekko.”

31 Se nuna nongota nunumi ago den tagikasan ale balukasan, “Ana balnak, ‘Kaem balam se,’ ma balnak, mu nu baluk, ‘Se awuk se nina John ko den ko nengemang ningi nunguning mena ya?’ maukko. 32 Bare ana balnak, ‘Mu kari balman se,’ manak, mu kariimet den mu ko me kuemonkowo,” makasan. Nuna kariimet nunga nguangakasan. Mu awuk, kariimet suen biya ikikasan John mu nu prophet makasan. 33 Buta se nuna Jesus ko den koma iwita balman, “Ana me ko ikisan,” maman.

Se Jesus nunga maonam, “Buta se ani betela kari awiriya balam se ani ura bitawasam imi mu balik se nina me ikialko.”